قصة شاب مصدوم (( في الإمارات _ رأس الخيمة بالتحديد ))

هذي قصة أحداثها حقيقية و واقعيه صارت في راس الخيمة و سمعناها منناس يقربون للشخص نفسه





القصة عن ريال وسيم و جميل و مثقف و متخرج من جامعة في الخارج و



صايع شوي.....




تتلخص القصة عقب ما خلص دراسة في الخارج بشهادة محترمة و رجع البلادعشان يتشغل و يتزوج ....



و طبعا إذا واحد ولد ناس معروفين و واصلين لازم ما بيتعب إنه يحصل وظيفه بسرعة .. ومجرد ما توظف على طول أهله قرروا يخطبون له ...



و هو طبعا وافق على طول إنه أهله إذا بيخطبون له لازم بتكون بنت محترمة و متدينه و ما تعرف



القصوى شكل الشارع إلا للضرورة...



و طبعا الأهل إختاروا له بنت ناس من معارفهم و طبعا بنت عايلة عريقه و محترمة و معروفه و هو طبعا ما بيشيل هم مصاريف الزواج لأنه الأهل ما بيقصرون ،،،، طبعا البنت محترمه و طيبه ،،، اللي ما تطلع من البيت و اللي حتى صديقاتها ما تزوهم ،،، هم اللي يزورونها في البيت،،، و لا تسير و لا مولات و لا أي مكان ,,,,,



في يوم الخطبة أو اليوم اللي انقصوا فيه على المهر و اتفقوا فيه على يوم الملجه......



اتصل به واحد من ربعه قبل ما يسير بيت الأنساب بشويه ... و قال له



( ترا نحن اليوم معزومين في شقة فلان عدنا حفله اليوم نبا نستانس



لا يا ريال أنا ما أقدر اييكم اليوم .... خطبتي اليوم )



انزين و خطبتك يعني شو ؟؟؟ ليش انته بتبات عند انسابك ،،، تعال لاه)



( أنا أبغي أودر هالسوالف ... خلاص أبغي أعود نفسي إني ما أسير



( انزين اعتبرها إنها آخر مره ،،، و تعال لاه خلنا نستانس



( انزين مب مشكلة بخلص و بييكم ،،، بس ما قلت لي منو بيكون هناك ؟؟؟


( ربيعتي و فلان و ربعيه ... يا بويه الشله نفسها اللي كانت موجودة العام و كل واحد وياه ربيعته





( انزين أنا أخاف حد يعرفني و لا شي لانه إذا شي صاير العام أكيد ناسينه السنة ،، بس انا توني خاطب و بعد ياي حفلة هذي قويه



( ودر عنك هالسوالف ،،، الحين كل واحد منا يخاف على نفسه من الرمسه ،،، تعال و فكنا من هالخوف اللي فيك



( اوكي مب مشكله بكلمك قبل ما اييكم ... تمام



( أوكيك نترياك




بعد ما خلصت مراسيم الخطبه و عقب ما حددوا موعد الملجه توكل الريال صوب ربعه عشان يسهر ويعربد وياهم، اتصل بصديقه و قاله إنه هو ياي صوبهم ،،،



أول ما وصل حصل الشله نصها موجوده ،، و الباقي كانوا يتجمعون شوي شوي ،،، و صديقة صديقه لين وقت متأخر ما يت ،، طبعا ربيعه يتصل في صديقته و هي تقول له الحين يايه ،،، نص ساعة و بوصل و عشر دقايق و نكون عندكم و دقايق و بنوصل ،،، لحد ما وصلوا عقب الساعة وحده تقريبا ،،،



دخلت صديقته و وياها صديقتها ،،، اللي انصدموا الجميع يوم شافوها ،،، و قالولها شو تسوين يايه ،،، مب خطبتج اليوم و قلتي ما بتحظرين حفلات مره ثانيه ،،، فردت عليهم و قالت



( أونس عمري قبل ما أدخل السجن الأبدي ،،، اليوم آخر يوم ..



المهم ... بدت الأغاني و الرقص ،،، و الريال كان متفرج ،،، و يالس بروحه ،، ياه ربيعه و قال له



( سير ايلس ويا ربيعة ربيعي ... حليلها يالسه بروحها ،،،، سير سولف وياها



( شقايل تباني ايلس وياها و أنا حتى ما أعرفها ...


( ألحين بكلم ربيعتي عشان تعرفك عليها





( زين والله عشان نونس عمرنا شويه بدال هاليسله الممله



( يالله بكلم ربيعتي




و سار و كلم صديقته اللي راحت قالت حق ربيعتها و اللي وافقت على طول إنها تيلس مع الريال،،،، تعارفوا على بعض بدون ذكر الاسامي



طبعا الريال اللي هو بطل قصتنا ... عنده فضول يبا يعرف اسم هالغاويه اللي بيجابلها ....



( ممكن أعرف اسمج إذا ما كان عندج مانع





( ماله داعي تعرف ... كلها كم ساعة و كل واحد بيكون في طريجه



( على كلامج ،،، كلها كم ساعة



و طبعا سولفوا مع بعض و صار بينهم انجذاب فقال لها



( إذا ما عندج مانع ممكن رقم تلفونج ،،، أكلمج عليه ،، ثراني ارتحت لج وايد



( و أنا بعد ارتحت لك .... بس ،، أنا قايله إني بودر هالجو خلاص



( هيه صح ،،، أنا سمعت إنج بتودرين هالجو لانج بتتزوجين ...



( هيه صح ،،، قريب انشالله



( ماشالله عليج انتي من متى مخطوبه ؟؟؟



( اليوم كانت خطبتي



( شو هالصدفه ،، اليوم بعد كانت خطبتي ،،، القلوب عند بعضها ،،، و انتي بتزوجين و أنا بتزوج



( للأسف ما عرفتك قبل ،،،






( ليش يعني ،،، هاذي هي الدنيا ،،، لازم كل واحد منا في يوم بيتزوج صح ،،،، و اللي بتزوجينه من أهلج؟؟



( لا ،،، ما يقرب لي شي بس من معارف أهلي ،،، كان يدرس في الخارج قبل و تخرج و اشتغل و يى خطبني



هنيه صابته غصه في قلبه ،، اللي تم يدق بأقوى ما عنده ،،، و اتمنى إنه الكلام اللي قاعد يصير مجرد صدفه و تشابه أحداث



( ها بتعطيني رقم تلفونج ...






( هيه ،،، سجل عندك و اتصل بي ....



خذ رقمها و قال لها بيتصل بها من يطلعون من الحفلة فقالت اوكي



( انزين ما قلتي لي ،،، يوم بتتزوجين بتعزميني على عرسج أكيد ،، و لا ما تبين



( أكيد بعزمك ،،، أغلبية ربعي بعزمهم



( بس كيف بتعزميني أنا بصراحة ما أعرف احضر عرس ناس ما أعرفهم وايد ،، أخاف حد يسألني انته ياي من أي طرف شو أقولهم إلا إذا كنت أعرف أهل خطيبج ،، أنه ممكن يمشي الموضوع عادي ،،،،






( إنته تدري بي ،،، أنا ما أحب الفضايح ،،، و تطلع تعرف خطيبي ،،، أنا بصراحه أخاف إنه يوصله عني أي خبر عليه و كفايه إني قررت أودر هالسهر ،،،




( لا تخافين أنا بروحي أخاف إنه حد من أهل خطيبتي يوصلهم أي شي عني



( انزين ،،، أنا خطيبي فلان ولد فلان ,,,, تعرفهم؟؟



( أسمع فيهم بس ما أعرفهم شخصيا ،،،،





هو كان يرد عليها هالرد ،،، و قلبه واقف من الصدمه ،،،، إنه كيف جذه ،،، البنت اللي خطبها اليوم يالسه وياه في الشقة اللي مليانه شباب و بنات ،،، اللي يرقص و اللي يشرب و اللي شكله صاير يلوع بالجبد ،،، خطيبته اللي المفروض تكون مؤدبه و خلوقه مو يالسه حذاله و لابسه تنوره قصيرة و تسولف وياه بطريقه انفتاحيه بعد ،،، إنه بيكلمها لحد ما تملج و تعرس و بعدين بتودره ،،، مصيبه مصيبه لو عرفت إنه اللي يالس مجابلنها هو خطيبها المصون اللي ولد ناس و محترم



المهم هو كمل سوالفه وياها بالقوه عسب ما يحسسها إنه عرف شي ،،،، و عطاها اسم ما يخصه بإسمه ،، عشان تبعد الشك عن اللي بيسويه




رجع البيت مب قادر يرقد ،،، يفكر شو لازم يسويه عشان يفتك من البلوه و المصيبه اللي توهق فيها ،،،، و تريا أمه لحد ما قامت من النوم و صبح عليها و حبها على راسها و قال لها






( امي ،،، أنا أبغي أفسخ خطوبتي بالبنت اللي خطبتوها البارحه


( جيه ،،،، شو استوا ،،، اصبحنا و اصبح الملك لله ،،، بلاها بنت الناس ،،، زينه و ما بتحصل أحسن منها





( قلت لج ما أبغيها ،،، و لا تناقشيني في الموضوع انا أقولج ما أبغيها يعني ما أبغيها



( و أنا ما بسير أقولهم و لا حرف واحد إلا إذا قلت لي شو بلاها البنيه



طبعا هو لازم يقول كل شي حق أمه لانه هو في النهاية ريال ،،، و ما يعيبه شو يسوي ،،، الناس بتذكر هالشي و بتنسى ،،، ما فكر في البنت شو ممكن يستوي،، يعني على الأقل جان كلمها يوم الرقم عنده و خلا البنت تقول إنها ما تباه ،،، يكون أحسن من الخبصه اللي سواها


خبر أمه السالفه كلها ،،،، ،،،

طبعا الام حرجت و قالت ،،، أنا لازم أخبر أمها ... و فعلا راحت على طول لأم البنت اللي على طول صابتها جلطه ،،، و تشللت مجرد ما عرفت إنه بنتهم تستغفل ثقتهم و رقادهم و هم مرتاحين، و تشرد بالليل عشان تحضر حفلات و تيلس مع ناس فاضيين،، همهم السهر و الوناسه ،،،





طبعا الخطوبه انفسخت و الريال ما يفكر ياخذ وحده من راس الخيمه ،،، أبدا






بنشوف هاذي اللي بتيي من برع راس الخيمه و بتكون بالإحترام اللي هو يدور عليه





وجهة نظري إنه عمره ما راح يتزوج و إذا تزوج بيكون شكاك ،،،، و حياته بتكون جحيم ....... لانه بيتصور إنه كل البنات بيكونون شرات خطيبته ،،، اللي لو ما سار هالمكان ما بيكون عرف شي بس هاذي ضربه قويه من رب العالمين .....



و رب العالمين قال ،،، الطيبون للطيبات ,,,, و الزاني ينكح الزانيه ....



بس وين اللي يفهمون .......